ماجيت اعزي جيت بآخذ عزاء فيه
............... شيخ البلد .. واميرنا اللي فقدناه
كبير قوم وبالوفا من يجاريه
................... سديد راي بمنطقه من عرفناه
له وقفةٍ تنهي كبير المشاريه
............... وقفة رجل والصلح في كف يمناه
وله صملةٍ بانت وزانت هقاويه
..................... مثل الحرار بهدته لي هددناه
وله مدةٍ تشهد لها بيض اياديه
................ خفيّ الكثير وبعض منها شهدناه
متبسم في وجه منهو يلاقيه
........................ ومرحبٍ بالكل ليمن لقيناه
كم من صغيرٍ لي لفا له يداريه
................. وكم من كبير لي ابتعد عنّه ادناه
ابو الجميع وكل منا يناديه
................ وين انت ياللي من صغرنا عرفناه
بوسط المصلى تاه منهو نعزيه
................... بين الجموع وكل ابونا حضرناه
وللمقبره كلٍ سعى لأجل يواريه
.................. وما اطولك يا درب اليها مشيناه
وعند القبر كن الجمع محتفي فيه
................... والدمع من حزن الموادع نثرناه
القبر ضم الشيخ واللحد داعيه
................... يالله عساه بروضة من وضعناه
وغبرة تراب القبر متشبثه فيه
..................... والدمع غطى العين يومٍ دفناه
فقيدنا اللي ياعسى الله يجايزيه
....................... بجنان خلد فوق ماهو تمناه
وصلاة ربي عد ما حل طاريه
................. على النبي واعداد ما احنا ذكرناه
،،،،،،،،
الله ,,, يسلمك شاعرنا
كتبت فاجدت,,,, صح لسانك
لانوفي ابو عبدالله فضائله على عرقه واهلها
نسال الله له الرحمه والمغفره
وان يلهم اهله الصبر والسلون
ولله الحمد من قبل ومن بعد