منذو مبطي
انا اشوف ذاكرتي ممتازة حيث اني مثلا ما ارصد رقم الاية والسورة بعد نهاية قراءة القرآن واستطيع اتذكرها ولو بعد اسبوع ولكن عندي مشكلة في تذكر الاسماء واستعراض الصور في المخ بطيء شوي ولذلك استغرق وقت طويل لمعرفة الشخص اللي منقطع عنه فترة طويلة .
قبل رمضان الله تقبل منا ومنكم صيامه كنت قاعد في مكتب عقار كود اطلع بنسبة بسيطة من النسبة اللي يقحشها مكتب العقار من الشاري واذ ثلاثة نفر يدخلون المكتب يتقدمهم واحد ابيضاني اشقر مفرع يعني بدون غترة ولا عقال ولا حتى طاقية ومد يده يسلم وقمت من الكرسي واذا هو يسحبني للمعانقة وكنه يعرفني وانا ما جبت خبره ، هو حس اني ما عرفته فذكرني باسمه ؟! ولكني ما لقطت الاسم وانا اعرف من الاتكيت انه اذا الواحد عرفك باسمه تقوم تعرف باسمك !! عاد هو قال انا فلان بن فلان لانه حس اني ما عرفته ولكن انا من زود البلاهة عرفته باسمي !!
عاد يوم جلس وتمقلت في وجهه عرفت من هو وضحكت على نفسي من زود البلاهة اعرفه باسمي وهو يعرفني وعاد ابي ارقعها سألته عن امه وكيف احوالها ؟! .
وقصة اخرى حول هالموضوع وهو اني مرة وانا اصلي العصر في مسجد حارتي واذا اشوف باخر الصف زميل في العمل ساكن بعيد واستغربت يصلي بعرقة ، الحقيقة ما ني متاكد منه والغريب انه جات عيني بعينه من بعيد وما لمحني لان شوفه يبدو انه ضعيف فقلت في نفسي اكدي هذا اخوه ولكن هو عاد طلع بسرعة وما لحقته .
في اليوم الثاني قلت لزميلي هذا : يا اخي انا شفت واحد يشبهك مرة كنه اخوك صلى معنا امس العصر ، قال ما هو اخوي هذا انا بشحمي ولحمي وانا ما شفتك ؟! وانا صليت عندكم لاني جيت لاحد الاستراحات انا وعائلتي !!! .