يا كثرهن ويا قلهن والحق على ربت البيت تربية يديك ؟

[الحجاج بن عرقة]

شيء متعجب منه كثير

هو كثرة الفتيات اللي ما تزوجن والشاب المسكين يطق كم بيت يبحث عن عروسة وما يلقى كلن يرده حتى ان الشاب يشك في نفسه لا يكون عنده سجل اسود موزع بين الناس او انه ما يصلي وهو ما يدري والمشكلة انك ما تعرف وش تبي هالبنت ؟ ما تقول تطمع في شاب مثل مهند حق المبي سي او مزيون مثل الحجاج بن عرقة وهي يا دافع البلى ما عندها ربع ما عند نور اللي ما شفتها ولكن يرون لي ماء .

الشرهة ما هي على البنت اللي ما تدري وين مستقبلها وترد كل الخطاب بدون سبب مقنع بزعم انه ما دخل مزاجها -الله يا عاد من زين المزاج - او هي بتكمل دراستها والشرهة بلى على امها وبوها اللي تاركينها على كيفها تكبر قدامهم وتقرب من العنوسه وهذا ما ينفي ان بعض الامهات يا دافع البلى تتشرط كنها هي اللي بتتزوج ، وهو عاد صحيح ان البنت ما تغصب على الزواج وان المفروض شرعا ان ولي امرها ياخذ رايها ولكن ما يمكن ان شاب ما به عيب يرد بدون سبب سوى ان المحروسه تبيه مثل مهند او ان راتبه قليل ما يكفي مقاضي السوق كل ثلاثة ايام ثم تقعد على هالحال ترد الشباب لين يروح شبابها ثم تبكي على حالها وتضطر تقبل اي فارس لو يجي على حمار او سخلة عرجا المهم تفتك من نظرات الحريم وقولة : هاو ليه ذي ما اعرست الى الحين ؟

يا ناس مو معقول يبحث الشاب عن عروس لمدة سنة بينما البنات تارسين البيوت !! ليه !! يستغلون حاجة الشباب للزواج والاستقرار وكنهن ماهن في حاجة للزواج والمفروض على هالوضع وكثرتهن ان الشاب يطلب مهر من البنت مثل ما هو في بنغلاديش والهند ، آه بس لو يفتح باب الاستقدام للزوجات او تسمح الدولة بالزواج من الخارج لكن تلقى هالبنات ينتفن شعرهن حسرة .

بعض البنات تحسن انهن هبلات كل تفكيرها زوج جميل وثري علشان ما تتاخر على السوق اسبوع وبعضهن تقول بكمل الدراسة واتوظف كنها هي اللي بتكد على البيت ولا يمكن بزعمها براتبها بتسيطر على الزوج وتذله لنها لها راتب ولا هي بحاجته وما تدري ان الوظايف معدومة للرجال اصلا وما عندها الا التدريس والمدرسات مالين المدارس وكل وحدة راتبها ما يقل عن خمسطعش الف ريال ولازقة بها الوظيفة حتى لو عندها شلقة بزران وليتها مع ذلك مرتاحة بل هي في شقى وتعب وطقاق مع زوجها لأن بعض الموظفات والمدرسات دلخات لها راتب اكثر من زوجها وتبيه يكد عليها حتى فاتورة خريطها في الجوال حقها اللي توزيه على زوجها تبيه يدفع الفاتورة وبعض الازواج ما تقول عليهم الا مجانين يترك زوجته تلهف ماله وهي تكدس فلوسها في البنك وتصرف على اخوها وابوها وامها وزوجها بالعيد داقته ركبة حتى لو هو مديون وهذا ما يعني ان كلهن كذا بل فيها زوجات سنافيات دايم تاقف مع زوجها في الشدايد وتشد من شعر اقصد من ازره وتمده بالمال والحنان بعد .

تراي انا هنا انصح الشباب بربة البيت ويخلي عنه طمع الدنيا ترى بعض الحريم الموظفات يذلن زوجهن وانتم شايفين الطلاق كيف وصلت نسبته والسبب في الغالب راتب الزوجة ، عاد بعض الشباب يقول حنا لقينا زوجة حتى نتشرط تكون ربة بيت وهذا صدق ولكن ان خيرت فاختر ربة البيت تراها نعم الزوجة ما عندها غير زوجها وعيالها فاضة لهم مهيب مثل العاملة تخرج معك وتعود معك وتتعب معك والطبخ والاولاد عند الخدامة ويا ويلك ويل ول تقرب راتبها ترى النفقة على الرجل ويا حسرتنا في الغرب النصف بالنصف حتى وهم ياكلون بالمطعم .

والسلام ولا احد يزعل .

[فله]

وفي رجاجيل ياخذون رواتب زوجاتهم ويصرفونها ويعرسون بها وحريم هي رجال البيت يالمصاريف الازواجج مايدفععععون شي حتى العيال من المداريس هي اللي توديهم وتجيبهم ومقاضضي البيت
لاتظلمنن الحريييييييم واللي تاخرت عن العرس يمكن تحتري الكفو ولا جا والعلم والدراسة ضروريه وفيه حريم كملو بعد الطلاق وتوظفوا وصرفوا عل عيالهن
وش ذا الحتسي
كل ماقلتوا السعوديات السعوديات ..... شوفو انفسكم ياسعودين

[همس الغلا]

فله اايدكلامك ومولازم تتزوج اقلهاهي تصرف وانت تكدس راتبك تعرس عليهاهي على الاقل ماراح تطلقك ولاتعرس عليك وكل الرجاااااااااااااااال انذال ولايستحقون الثقه وهذاالشرع انت الي تصرف ولاالدين على شي وشي لا(دابلين سبدي وجع)الحمدلله طلعت الي بقلبي ولامسويه انفجااااارهنا

[الحجاج بن عرقة]

اوخيتي فله

كلامي عن الفتيات اللي يردن الخطاب بسبب تافه وما جبت طاري الشباب وإلا فيه ازواج انذال ( بكتب عنهم قريب ) ، اما الكفو فانا مومن بنظرية ان يفوت القطار ولا يدهس الفتاة لكن المشكلة ان الشباب يتعبون حتى يلقون فتاة تقبل بهم مع نا البيوت متروسة

اوخيتي همس الغلا

عاد ما تاصل لقولت ( كل الرجال انذال ) ترى الرجال فيهم ابوك واخوك وعمك وخالك قولي بعض الرجال وسلامة قلبك

راجعوا قراءة الموضوع وبتفهمون قصدي ولا تسرعون

[أم سعيد]

أخي الحجاج ..!

اعذرني على ما سأكتب .. لكن أسلوبك هزلي في طرح مشكله اجتماعيه كبيره وخطيره ومتفرعه ..



أولا ً أخوي /
يبدوا لي انك لم تعش واقع الفتيات لتتحدث بلسانهن ..!
من قالك ان البنات يفكرون كذا ..!
عفو لكن هذا خطأ !!
هذا التفكير اللي احنا نشوفه في المسلسلات غير الواقع ..
البنات من قالك انهم يدورون بشكل الرجل وإذا ما عجبهم رفضوه !!!!!!!
معقوله فيه انسان يفكر كذا !!
اللي تفكر كذا اسمح لي أقول انها جاهله ولا تفهم !!


ثانيا ً / عبارة ( والشرهة بلى على امها وبوها اللي تاركينها على كيفها تكبر قدامهم وتقرب من العنوسه ) !!!!
عفوا أخوي بسأل هل انت جاد في تفكيرك هذا ؟!
إن الأهل يغصبون بنتهم مثلا أو يجبرونها تتزوج ..!
طيب وينك من قول الحبيب ( لا تنكح الأيم حتى تستأمر , ولا البكر حتى تستأذن ) .!
لو انت بمكان والد لبنت ..
وجاك رجال كفو , وبنتك ردته وهو كفو , هل بتغصبها تتزوجه ؟
إذا اجابتك بـ ( نعم ) فاسمح لي أقولك راجع نفسك ..
البنت ليه ترفض رجل اذا كان كفو إلا ولها أسبابها ..
ممكن استخارت ولا لقت الراحه .!
ولها أسبابها ..



ثالثاً / مهند ونور ..!
عفوا لذكر هذه الأسماء التي تكرم مجالسنا عن ذكرها .!
((بعض البنات تحسن انهن هبلات كل تفكيرها زوج جميل وثري))
اخوي انت لست فتاة فلا تتكلم وكأنك تعيش واقع الفتيات وتفهم ما في خلدهن ..
صح ان البنات ينجذبون للزين والمملوح لكن إنها ترد شاب عشانه ما يشبه مهند .!
فهذي متخلفه مع احترامي لها .. ولا أتوقع انها موجوده في مجتمعنا ولله الحمد ..
ولا أدعي المثاليه بل هو الواقع ..
إنما ما يتناقله الفتيات مجرد كلام , وأحلام ..
لكن إذا جا الصدق فالفتاة تعرف كيف تختار ..



رابعاً / الزوجه .. والراتب والسيطره ..!
طرحك لهذه المسأله كان جدا عنصري ..
انت تعلم أن من حقوق الزوجه على الزوج ( النفقه و السكنى والملبس )..
ولو كانت الزوجه مليونيره والزوج يشحذ فإن نفقتها وااااجبه عليه ..
وهذا ليس كلامي بل كلام الشرع ..
يعني راتب الزوجه لها ومن حقها تصرفه أينما شاءت ولا يحق للزوج منعها أو التحكم براتبها دون إذنها ..



ثبت وجوب نفقة الزوجية بأدلة من الكتاب والسنة والإجماع والمعقول.
أما الكتاب فقوله تعالي: (والوالدات يرضعن أولادهن حولين كاملين لمن أراد أن يتم الرضاعة، وعلي المولد له رزقهن وكسوتهن بالمعروف).
وقوله تعالي: ( لينفق ذو سعة من سعته ومن قدر عليه رزقه فلينفق مما أتاه الله لا يكفي الله نفساً الا ما أتاه سيجعل الله بعد عسر يسرا).
وقوله تعالي في شأن المطلقات: (أسكنوهن من حيث سكنتم من وجدكم، ولا تضاروهن لتضيقوا عليهن وان كن أولات حمل فأنفقوا عليهن حتى يضعن حملهن)، قد أوجب الله تعالي علي الأزواج إسكان المطلقات من حيث سكنوا حسب قدرتهم وطاقتهم وإذا وجب إسكان المطلقة فإسكان الزوجة أولي بالوجوب، حيث أن زوجيتها قائمة حقيقة وحكما، والمطلقة لم يبق لها إلا أحكامها أو بعضها فقط .. علي أن الآية أوجبت الإنفاق عموما للمطلقة الحامل.
وأما السنة فقد وردت عن النبي عليه الصلاة والسلام أحاديث كثيرة تفيد وجوب النفقة منها:
1. ماروى من أن النبي عليه السلام قال في خطبته بعرفة في حجة الوداع: (ولهن عليكم رزقهن وكسوتهن بالمعروف)، وفي رواية (نفقتهن) بدلاً من
(رزقهن).
2. ما روى من أن رجلاً جاء إلي النبي عليه السلام فقال : ما حق المرأة علي زوجها؟ قال (يطعمها إذا طعم، ويكسوها إذا كسي، ولا يهجرها في المبيت، ولا يضربها ولا يقبح)
3. ما روى من أن هند بنت عتبة زوجة أبي سفيان قالت يا رسول الله " أن أبا سفيان رجل شحيح وليس يعطني ما يكفيني وولدي إلا ما آخذ منه وهو لا يعلم، فقال عليه السلام: (خذي ما يكفيك وولدك بالمعروف). فلو لم تكن النفقة واجبة علي الزوج لما أمرها النبي عليه السلام بأن تأخذ من مال زوجها بغير أذنه وبغير علمه ما يكفيها بالمعروف إذ لا يجوز أخذ شئ من أموال الناس بدون حق.
أما الإجماع، فقد أجمعت الأمة في كل العصور من عصر الرسول عليه السلام حتي الآن، علي أن نفقة الزوجة علي زوجها ولم يخالف ذلك أحد.!!!!



أتمنى تراجع نفسك .. وترجع تصيغ الموضوع بأسلوب أفضل .. وأكثر حياديه وواقعيه ..
وأتمنى تتفهم وجهة نظري ..

بإنتظار تعديلك ..
الزعل ممنوع والعتب مرفوع ..



شكرا جزيلاً وعذراً على الإطاله ..

أم سعيد ~

[فله]

كفيتوا ووفيتووووووووووووووووووا

[الحجاج بن عرقة]

أم سعيد

انا رجل واعيش واقع الرجال واما لافتيان فلا ادري عنهن وهذي خاطرة جمعتها من هنا وهناك من خلال تجارب زملاء واصدقاء

أما امها وابوها فاقصد ينصجونها وما اقصد يجبرونها وعين يناقشونها بسبب رفضها مهوب يسكتون وبس

وانا قلت بعض البنات يفكر بمثل مهند وهذا واقع وهن مثل الشباب اللي يفكر في مثل نور

اما النفقة صحيح ولكن بعض المشايخ يفتي باخذ مال من الزوجة مقابل تقصيرها وهذا موهب من عندي وانا سامعه باذني

ما قلته يا اخويتي وجهة نظر وانت بكيفك ولا تحجرني على عقلي

فله

اكيد واقفة مع الملسونه ام سعيد

[عشقي هواها*]

أتمنى أن تكون اكثر انصافاً
فليس كل النساء بهذه العقليه
تقبل مروري