ما شفت ولا سمعت عن شعب مثلنا
شعب كسول وهامل ما يقدر يسوي شي في بيته
ولا مع هالدبابات زاد الكسل وكلما بغى البيت شي قال اتصوا بالبقالة
والعيال ما يصدقون خبر يبون خبز صامولي فقط ويجبون معه بلاوي متلتله
وبدال ما يدفع البيت ريال يزيدون عشرة ريال وحرام هالعامل يمشورونه على ريال واحد
بصراحة حنا عطينا هالعمال وجه وصاروا يضحكون علينا وحنا نستاهل
اجل واحد بشنب ما يقدر يصلح في بيته شي
خلاط موية ما يعرف يركبه ولمبه محترقه ما يعرف يغيرها وفيش خربان ما يقدر يبدله
وليه يتعب نفسه والعمال كثر والجيب مليان
ليه الواحد منا ما يحط عنده عدة ويتعلم وحتى زوجته وبنته يتعلمون وما يمنع لو غلطوا مرة او مرتين ولا يمنع
لو لفطه الكهرب مرة او مرتين ولا يمنع لو سلك خط 110 شال الحرمه ولفطبها المهم تتعلم كيف تصلح الكهرباء
والبيت اللي ما فيه عدة ما فيه بركه والسالفة ما تحتاج ميزانية
عدة ما تكلف شي تغنيك عن شحاذة هالعمال
واي شي بيتك خربان هات هالعدة وصلح بدال ما تدفع فلوس ببلاش والمسالة بسيطة
بعض الناس ما يقدر يغير خلاط موية وكل ما يحتاج مفك ابو جلمبوا وتيب بريال ويلف ويربط
وبعض الناس ما يقدر يغير شطاف وهو يربط باليد
وبعض الناس ما يقدر يغير فيش كهرب وما فيه اسهل منه لكنه جبان يخاف الكهرب ينشبه بالجدار
وبعض الناس ما يستطيع يغير لمبه يخاف مع ان الطفاي يفصل الكهرب عنها
لكن هذ حنا كسل في كسل ويجيدين ندفع دارهم دام هالعمال متوفرين حتى لو هم طماعين
الخلاط باربعين والشطاف بخمس طعش والفيش بثلاثين وادفغ الله لا يهينك وخل الكسل ينفعك
قليل من الناس شقردي يشتغل ببيته شغل ما هو سهل يبني ويبلط ويفك ويربط ويصبغ
يقول لي صديق مقرب انه مرة انسدت عليه غرفة تفتيش بالسور وراح لمحل سباكة عند مكاتب العقار
وقالهم السالفه وقالوا معشر البنغالية ابشر لو تبينا ننزل بالبياره اهم شي تدفع
خذوا من المحل ماصوره بلاستك نص بوصه خفيفه وقفازات وذهبوا للبيت
يقول صاحبي وريتهم الغرفة المسكرة وعرفوا السبب وقالوا نتفق على السعر
قال صاحبي قلت كم تبون وفكروا شوي وقالوا خمس ميه
اي والله خمس ميه
قال صاحبي كثير هذا وقالوا اجل كم تبي قال ما ابي شي انقلعوا
على باله يبون خمسن او ميه
المهم فكر صاحبي هذا وقال ليش جايبين ماصوره بلاستك ؟!
وعرف السنع وهو عاد شقردي
راح للمحل وشرى ماصوره بلاستك نص بوصه وفتح غرفة التفتيش القريبة من غرفة التفتش المنسدة من جهة البيارة ولبس القفازات وادخل الماصورة وحرك وحركتين واذا الماء يندفع وتنتهي المشكلة
والعملية يقول ما خذت مني الا عشر دقائق وكلفتني عشرين ريال ووفرت 480 ريال
ولا خليت هالبنغلاديشية يضحكون علينا