يوميات عرقاوي أصلي

[الحجاج بن عرقة]

مواقف كثيرة تمر على الواحد منا في حياته اليومية منها الموقف المضحك والموقف المبكي والموقف العجيب وأنا باسرد لكم مواقف يومية طريفة ومحزنة وعجيبة مرت او بتمر علي خلال وجودي في الحياة واذا مت فالله يرحمنا برحمته

بالأمس

أجدد بلاط الحمام في البيت حيث المرة أزعجتني ولقيت لي مبلط باكستاني ممتاز وبيمسك السباكة بعد قلت والله زين وبقلل علي التكاليف ، اللي حصل انه كسر بلاط الحمام وليس الجدران بعد ان فك مواد السباكة وبعد ما بلط وجد باب الحمام يبيله قص من الاسف لانه بلاط الحمام ارتفع شوي فقلت للمبلط قص بالصاروخ من الباب شوي من هالجانب وشوي من هالجانب ثم شل قطعة الخشب هذي بالمفك وخلاص ، كنه تنرفز شوي وقال يا اخي : انا مبلط بس ماني نجار ؟! قلت طيب اذا انت مبلط بس ليه مسكت السباكة ؟! ضحك الباكستاني بقوة قال طيب بسوي نجار .

اليوم

عند محطة البنزين اليوم وقفت اعبي السيارة وكالعادة يسأل العامل : فل ؟ قلت ايه فل ، ثم يسأل احمر وإلا اخضر ؟ قلت نص نص !! نص احمر ونص اخضر ؟! بعدين نزلت من السيارة ورحت للبقالة وانا في الطريق قلت هالمهبول لا يسويها صدق ويعبي نص نص ؟! رجعت عليه وقلت له عبي احمر انت صدقت نص نص !! هو فيه أحد يعبي نص نص ؟! قال فيه كثير ؟! انت صادق ؟ قال ايه كثير نفر يقول عبي عشرة احمر ، عشرة اخضر !! صدق عالم مهوية .

[أم سعيد]

ههههههههههه
فعلا شفنا العجب في هالعماله (=
يعطيك العافيه اخ عرقاوي اصلي ..

[عشقي هواها*]

في الصميم .. يعطيك العافيه .. اخي عرقاوي اصلي

[سفـ عرقه ـير]

كنه اخواننا المصاريه
وقت الدراســــة >>> مدرس في مدرسة اهلية
وقت الاختبارات >>> مدرس خصوصي
في الاجــــــــازة >>> سباك
تقبل مروري

[الحجاج بن عرقة]

ليلة البارحة

هذه موقف غريب حصل لي البارحة بالليل في محل بوابة الجامعة للالكترونيات حق ابو صالح ولي حاجة هناك للكمبيوتر اللي انا بوه غشيم !! تعرفون هاك المحل اللي يبيع فيه واحد يقال له سناء وهو بغلاديشي حبيب ودايم يسوي لي خصم ، محل ضيق وانت داخل على يسارك سناء وعلى يمينك دريشة الصيانة وهذا الممر الضيق لو يوقف فيه تركي الدوسري ما احد يمر !!! وعادي ادخل والقى حرمة ناشبة بالجدار ومدخله راسها في دريشة الصيانة تكلم المهندس واذا هي سمينه ما تقدر تمر تشوف الاكسسوارات حقت المحل !! البارحة جيت واذا العمال واقفين بالممر وبه ولد يبدو عليه آثار النعمة ( ولد نعمة ) وبهو فتاة لابسة عباية كتف وشعرها منسدل ( حلوه منسدل ) اسود يلمع وواضح انها فلبينية من الشعر لاصقة بالجدار وداخلة راسها بالدريشة وتكلم المهندس انا دخلت والسلام عليكم واشوف هالفتاة اللي هي صغير ولا هي كبيرة وضننتها اخت هالولد السبهة اللي ما تكلم ولا رد المهم انا ابي شيء معين وقلت سناء عطنياه ولا لقيت بال للفتاة خوف الفتنة المهم اخذ البضاعة وقلبتها وطلعت البوك باعطيه دراهم والفتاة خلفي وشوي اذا قليلة الحياء واقفة على يساري تتمقل فيني ومن زود قلة الحياء تلعب بشعرها باصابعها وواضح ان المسألة عرض !! تعوذت من الشيطان الرجيم اللي امرني القي نظرة عليها لكني رفضت قلة الحياء حقتها وانا والله من جوى احترق ويتقطع قلبي وودي لو أخذ طابعة ليزر واشلخها على راسها قليلة الحياء اللي يبدو نها منقهرة اني ما التفت يمها المهم هي عادة للدريشة وترطن مع المهندس هاك العربي الفصيح اللي بوه لكنة فلبينية عاد انا حللت الموضوع وهي انها جاية مع هالولد اللي يمكن عمره 14 سنة وهي يمكن انها مربيته او المرافقة حقته حيث انه يبدو انه ولد نعمة !! عاد انا خذت حاجتي وخرجت وهي مازال موجود وكنت اتفكر في البنغالية الاثنين الي كانوا واقفين بالمرر شكلهم فتنتهم هالفلبينية !!

[الحجاج بن عرقة]

منذو مبطي

انا اشوف ذاكرتي ممتازة حيث اني مثلا ما ارصد رقم الاية والسورة بعد نهاية قراءة القرآن واستطيع اتذكرها ولو بعد اسبوع ولكن عندي مشكلة في تذكر الاسماء واستعراض الصور في المخ بطيء شوي ولذلك استغرق وقت طويل لمعرفة الشخص اللي منقطع عنه فترة طويلة .
قبل رمضان الله تقبل منا ومنكم صيامه كنت قاعد في مكتب عقار كود اطلع بنسبة بسيطة من النسبة اللي يقحشها مكتب العقار من الشاري واذ ثلاثة نفر يدخلون المكتب يتقدمهم واحد ابيضاني اشقر مفرع يعني بدون غترة ولا عقال ولا حتى طاقية ومد يده يسلم وقمت من الكرسي واذا هو يسحبني للمعانقة وكنه يعرفني وانا ما جبت خبره ، هو حس اني ما عرفته فذكرني باسمه ؟! ولكني ما لقطت الاسم وانا اعرف من الاتكيت انه اذا الواحد عرفك باسمه تقوم تعرف باسمك !! عاد هو قال انا فلان بن فلان لانه حس اني ما عرفته ولكن انا من زود البلاهة عرفته باسمي !!

عاد يوم جلس وتمقلت في وجهه عرفت من هو وضحكت على نفسي من زود البلاهة اعرفه باسمي وهو يعرفني وعاد ابي ارقعها سألته عن امه وكيف احوالها ؟! .

وقصة اخرى حول هالموضوع وهو اني مرة وانا اصلي العصر في مسجد حارتي واذا اشوف باخر الصف زميل في العمل ساكن بعيد واستغربت يصلي بعرقة ، الحقيقة ما ني متاكد منه والغريب انه جات عيني بعينه من بعيد وما لمحني لان شوفه يبدو انه ضعيف فقلت في نفسي اكدي هذا اخوه ولكن هو عاد طلع بسرعة وما لحقته .

في اليوم الثاني قلت لزميلي هذا : يا اخي انا شفت واحد يشبهك مرة كنه اخوك صلى معنا امس العصر ، قال ما هو اخوي هذا انا بشحمي ولحمي وانا ما شفتك ؟! وانا صليت عندكم لاني جيت لاحد الاستراحات انا وعائلتي !!! .