البارحه ربي كتب لي ومريت
درب عليه بروق الاحباب لاحت
جيت المكان اللي جمعنا وخفيت
وقامت جروحي للجوارح وصاحت
ياليتني في لفة الدرب زليت
كان العيون من الدموع استراحت
التم غيم الدمع من يوم.. لفيت
وورقا القصيد لشوفة الغيم ناحت
وضحكت ما ابغى الناس تدري يابلفيت
لكنها غصب على العين ساحت
حارت دموعي في عيوني وصديت
وارمشت ابيها ما تبين وطاحت
وعقبه برق في العين براق واسقيت
خدي ووناتي بصدري تلاحت
وانا احسب اني في فراقه تعافيت
وان عبرتي من مدخل الزاد زاحت
اللي يحسب اني على البعد سجيت
والا ان عيوني للرقاد استباحت
يا ليتني من قبل لا احبه اقفيت
والا ان دروبي عن دروبه تناحت
اهون على من البكا والتناهيت
واشلا من سدود على الناس باحت
عرفت كيف الحي يفرق عن الميت
وعرفت قيمة نعمتي يوم راحت
قولوا لها اني عقب بعده تدانيت
ورجلي عن دروب المعافين شاحت
البعد نار وطاعة العذل كبريت
يقصر على بعده.. ترى الكبد فاحت