تدري اني احبك .. يا شبيه السراب
دام محدٍ وصلك من البشر .. إلا انا
فيك مسرى غرام / وفيك لذة عتاب
وفيك شهد الوصال / وفيك غربة عنا
لبسك يذوب فيك وتستغيض الثياب
وتستحي الشمس تشرق وانت كلك سنا
يا الذبوح المزوح .. وكل مابك عذاب
دام خصرك فقير .. وفيك طفرة غنا
لا تحاول تمادى.. خافقي ما يهاب
حتى لو كنت شيخ الزين .. واغلى ضنا
والله إني انخلقت وهامتي فالسحاب
ينحني الكون .. لكن عاتقي ما انحنى
ان بغيت الرجوع احسب لجرحي حساب
وان بغيت الرحيل .. أرحل والله لنا
علمتني غلاتك .ويش معنى الغياب ؟؟
وعلمتك الليالي السود .. منهو أنا
للمبـدع الرائــع حمــد البريدي